睇返啲畢業相，我們呢一群不知天高地厚小傢伙，個個都係食爺飯着乸衣，無憂無慮，依家對住塊鏡，望返自己，相信每位都已經半頭白髮、匆匆四十年已過。
早期定居於這個陌生異鄉，身無分文，為着有瓦遮頭，為着下一代幸褔、日做夜做。
每日倆公婆返工，返屋企仲要洗衫煮飯，家頭細務，喂奶喂飯，接送返放學，忙到一頭煙。
得閒死唔得閒病、所有時間都放响建立家庭，仲邊有閒情去攪聚會，呢段時間，相信我哋都係最辛苦一群，所有甜酸苦辣我們呢一代個個都嘗過。
依家仔大女大，總算有個安樂茶飯，雖然生活比上不足、但總算比下有餘，有兩餐溫飽，都已經滿足，以後日子就係我哋開始聚埋一齊想當年啦！
今次好難得能夠籌備成功，將我哋呢群失散四十年，當年嘅靚仔靚女依家個個都變成神鵰大俠，從五湖四海嘅一群高手集埋一齊，講吓江湖事，論吓劍，睇邊個做咗武林盟主，邊個練成神功，英雄蓋世，總之今次係百年唔逢一潤，唔參加好嘥，幾難得再聚頭，俗語有話，百年修來同船度，我哋唔知修咗幾多百年，先至可以同窗三年，失散四十年後又相聚。
好開心見名冊上有咁多同學出席，亦都好可惜那些未能參與之同學，錯失今次機會，唔知將來再有冇機會舉辦。
No comments:
Post a Comment