我與越南鳴遠十二屆同學慶祝畢業四十週年小聚(梁翠群) (07/08/14)

好耐…好耐…冇上吉如吹水，個心都好掛住班同學仔，硬係人閒心唔閒。

呢次睇到大家又再重溫四十週年聚會嗰件事，我試下重新練番「九方神功」，搵返個茶煲煲水，哈哈…。好啦，話歸正題，呢輪唔知因乜嘢事，半年來一直都無心機，冇晒樂趣，半隱居咁，好似武俠小說經常提到「看破紅塵…」，好彩重未到「削髮為尼」咁慘，介因我重貪戀美食（有圖為証，今年身材橫過舊年），哈哈！

左起 : 翠群，袁妹，國炎，駱强，明輝

講到四十週年記念，我同幾個响越南嘅同學仔聚會應該算係最先慶祝嘅一族！

舊年年尾亞細妹初為人母，佢係高齡產婦，產前有併發症，真係好危險，可能上天憐恤亞妹咁多年來對亞媽一片孝心，上天保佑亞妹大步檻過，生咗個好得意，好趣志嘅囡囡，所以我返越探親嗰幾個星期都一直忙著幫手照顧佢哋兩母女，等亞妹同啤啤女安定咗，辦咗滿月酒會，我先至有機會去參加Miền Tây Sông Nước四日遊。

最後臨離越前幾日，联絡到駱强同學，佢真係好本事，一日之內幫我約到幾位同屆同學仔於星期日，一月十九日响香港酒樓飲早茶。當日聚會好短暫，淨係得幾個人，除咗駱强有見過面，其他幾位都係離校後首次見。

三位紳士大爆秘聞

大老闆輝哥係Citymart CEO，佢好俾面，百忙中抽空來聚會，重帶手信送俾我，好多謝佢嘅心意，其實我亦係Citymart 嘅忠實顧客，每次去Hùng Vương Parkson Plaza 玩保齡，我一定响同一層嘅Citymart超市買幾對靚襪，香口糖，果仁等小食，甚至有時順便買啲古靈精怪嘅手信用品，價錢與其他超市一樣（唔好意思，廣告吓，嘻嘻）。

袁妹好好嘢，佢送俾我幾個手織小飾物好得意。袁妹因患有憂鬱症，醫生勸佢要搵啲手藝做可避免胡思亂想，唔知唔覺佢學識串珠呢！

好可愛嘅手串小飾物

楊國炎，駱强兩人好搞笑，尤其駱强自稱「笑佛」，睇落都幾似，哈哈！

「笑佛」駱强

 楊國炎，駱强爆料當年「鳴遠八子」被集体開除嘅秘聞，可能其他同學己聽講過，我係第一次聽到啫，「鳴遠八子」好勇啊！若果駱强或楊國炎肯貼文詳細描寫當年事跡，相信吉如點擊率一定急升喇！可惜梁小妹因醫院有急事要佢報到，何竹瓊要返鄉下探媽咪以及做義工，免費教小朋友中文，所以呢兩位靚女缺席，我亦未取得佢哋嘅「三分鐘自我介紹」，希望下次有機會再聚吧 ！
睇見翠儀，偉銓同學，吉如等咁落力為我哋奉獻寶貴時間來寫作，編輯精彩聚會片段，真係唔話得！希望我呢編報導亦有小小供獻當回報吧！奈何全係粗言俗語，請勿見怪，就算看官真係見怪…多見多怪，最後都會…見怪不怪喇，哈哈！

再見—翠群