時間過得好快,唔經唔覺返澳洲都兩個月,一切生活都回復正常,呢個幾月嚟每日都將我到訪美國時所攝錄之片段燒入光碟保留,冇法每日放工後只得幾個鐘時間,同時我部落後過時電腦,燒錄光碟時,好似龜躝,所以每日只做得一隻,當然我要將百多GB原汁原味保留,真係嘥好多時間,冇所謂啦!值得!到有朝一日,老咗,行動唔方便,囉返出嚟睇,懷舊想吓當年都好。
之後我開始做剪接將所有片段縮短成幾隻光碟,送上吉如同大家分享,在我剪接過程中,檢閱片段從頭到尾,真係好懷念,樣樣事彷佛剛剛發生,印象猶新,所以我個人對攝錄動畫喜愛多過拍硬照,有啲生動,希望看官觀賞後亦有同感。
有一件事先向某些畫面中主角致歉,因隨意攝錄,所以可能有啲醜態上鏡,我已經盡量剪除,但難免有疏漏,敬請原諒,當然我只係愛好攝錄留念,相對專業人仕拍攝,簡直蚊同牛比,我嘅攝影技術就好似床下底放紙妖,高極有限。
自從我歸隊至今都年半多,回顧覺得人生好奇妙,四十年前每日同窗,畢業後就各散東西,各奔前程,我本人完完全全與大家失去聯絡,可能為著逃離共產,經歷幾多驚險,艱辛先至能夠安居於呢個樂土,剛到步身無分文,又要建立家庭,種種困擾,仲邊有心情時間去尋找惜日嘅老同學。
有時唔信命都唔得,個天安排我手傷,返唔到工,在家養傷期間,幸好發現吉如網站,報到現身,一輪熱鬧,素勤提意聚會聯歡,真係難得機會,四十年啦,今次係一個好時機見番大家,點可以走雞唔參加,雖然兩年前啱啱到訪完美國東西兩岸,今次為着見一見老友記,再去又何妨,當然今次去唔剩只一個目的,順道試吓從未座過嘅郵輪,及探親。
總結今次旅程,有開心有遺憾,開心四十年後仲有機會見番大家,個個都成熟穩重 女嘅美麗動人,男嘅英俊瀟灑,唔再係當年嘅老土一族,(可能鳴遠校規太嚴,當年西堤學生都係咁講,我地都俾人唱好薯,女嘅裙不過膝,男嘅髮不過耳,哈哈可能係咁,先至做就今日咁多鳴遠精英,我唔係誇大,灶君上天--有嗰句講嗰句,大家見面時,傾落先知呢位唔係做工程師,嗰位就做會計師,乜師密師,人材際際,可憐我呢個二打六,未夠斤兩晒命。)
另一個開心係能夠享受七日豪華郵輪,每日三餐精美佳肴,平靜嘅海洋,真正偷得人生七日閒。遺憾係,在三番市及去賭城期間,唔好彩傷風身體唔係好妥,唔能夠盡興,但我要多謝好幾位同學關懷問候,尤其係駿華四哥四嫂施藥關照。
總結今次要多謝聯歡會籌委會成員、澳洲隊長,勞心勞力,更加多謝吉如帶領我歸隊,同埋俾呢個網上平台我發噏風,做個八公。多謝!
豪爽多情,直言直語,真心流露,粗中有細,立言得體,文筆流��。
ReplyDelete不辭勞累,將美麗的回憶與大家一齊分享! 讚賞有加!佩服!!
小鳴鳴.
你的廣東白話,如行雲流水,順暢流利,直把心感身受,毫不掩飾的流露出來,背負的艱任,終於得到認可。
ReplyDelete謝謝你為我們錄下了很多珍貴的短片。